Нидерланды ван Персидің құрметіне монета шығарады

Нидерланды Робин ван Персидің құрметіне ескерткіш монетасын шығаратын болды. Оның бір бетінде әйгілі футболшының Испания құрамасының қақпасына баспен соққан голы бейнеленетін болады, деп хабарлайды De Ondernemer.

Монеталар алты мың данамен шығарылмақ. Оны сауда айналымына енгізу жоспарда жоқ, тек коллекционерлер үшін шығарылады дейді голландиялық ақша жасаушылар.
Оны сатып аламын деушілер 13 шілдеге дейін күтуі тиіс. Бразилиядағы әлем біріншілігі өз мәресіне жеткен соң ван Персидің монетасына қол жеткізуге болады.
Алайда, өзге деректерге сүйенсек, нумизматтар бүгінгі таңда аталған монеталардың 80 пайызын айналымға шықпай жатып-ақ сатып алып қойған.
Естеріңізге салайық, Нидерланды ұлттық құрамасы Әлем чемпионатындағы алғашқы ойынын Испаниямен өткізіп, 5:1 есебімен жеңіске жетті. Сол ойында Робин ван Перси әуедегі допты секіріп барып баспен ұрып, чемпионаттағы ең әдемі голдардың бірін соққан болатын.
Жартылай финалда Ван Гал шәкірттері аргентиналықтармен күш сынаспақ.